کراچی کے مختلف علاقوں سے 7 افراد کی لاشیں برآمد

کراچی میں شدید گرمی اور دیگر وجوہات کے باعث پراسرار اموات کا سلسلہ جاری ہے۔ پیر کے روز شہر کے مختلف علاقوں سے مزید 7 افراد کی لاشیں ملی ہیں، جس کے بعد ایک ہی دن میں اموات کی تعداد 17 تک جا پہنچی ہے۔ ریسکیو ذرائع کے مطابق، جاں بحق ہونے والے زیادہ تر افراد نشے کے عادی تھے اور گرمی کی شدت برداشت نہ کر سکے۔ ان افراد کی عمریں 35 سے 60 سال کے درمیان بتائی جا رہی ہیں۔ لاشیں جن علاقوں سے ملیں ان میں جامع کلاتھ مارکیٹ، گلستانِ جوہر، سپر ہائی وے، فیڈرل بی ایریا، گولیمار، لانڈھی اور سرجانی ٹاؤن شامل ہیں۔ تمام لاشوں کو متعلقہ پولیس تھانوں کے حوالے کر دیا گیا ہے اور شناخت کا عمل جاری ہے۔ اتوار کے روز بھی شہر سے 10 لاشیں ملی تھیں، جس نے شہریوں میں تشویش کی لہر دوڑا دی ہے۔ پولیس نے واقعے کی مکمل تحقیقات شروع کر دی ہیں تاکہ اصل وجوہات سامنے آ سکیں۔